كيف تستغل وقتك في شئ تستفيد منه "" الموضوع روعه وراح تحسون بلذة الوقت ""

مساعى وانا آدرس رياضيات جاتني فتره فهّيت فيها شوي او نفس ماتقولون خذت راحه مدتها 8 دقايق تقريبا ً, في هالـ 8 دقايق خذت قلم وقعدت آكتب وأوقّع ومادري أيش وأشخبط ورسمت بالغلط " مثلث " , المثلث هاي هو اللي جاب هالموضوع , شلون ؟ انا اقول لكم شلون .

المثلث هاي ذكّرني بأحد قوانين الرياضيات القديمه إذا تذكرونة وهو مثلث لتسهيل الدراسه , مثلث فيه 3 اشياء مثلا ً إذا تبون هالشي اقسموا ذي على ذي , وإذا تبون هالشي اضربوا ذي في ذي الخ , تذكرونة ؟

هاي هو اللي جا في بالي لتقسيم الـ 24 ساعه لليوم الواحد !

لكن الطريقه تختلف شوي , فالبداية رسمت مثلث وكتبت فيه ::

- وقت فراغ
- استغلال الوقت
- رياضة

قعدت آكتب تحت اللي سويته فاليوم الكامل , طلعت اني مستغل اليوم بنسبة 3% بس .

باقي الوقت كله يمر ع الفاضي , فااا لجأت لشي ثاني ورسمت مربع ! وفيه التالي :-

- فراغ
- صلاة
- نوم
- استغلال الوقت

النوم الطبيعي للأنسان لازم يكون 8 ساعات , شيلوها من الـ 24 ساعه بيصير معانا 16 ساعة بس .

ييبوا لكم الحين ورقه وقلم وكتبوا الاشياء اللي تسوونها فاليوم الكامل , بتلاقون نفسكم ماتسوون شي كلش , بس جي قاعدين او تستغلونه في شي بسيط مايتجاوز 4 ساعات والباقي كله فاضي .

فااا الحين ( مساعى ) كتبت اشياء معيّنه وهي :-

الفراغ بالنسبة لي ينقسم إلى انواع وهم ::

- طلعة
- فيديو جيمز
- اكل
- سبوح
- انترنت

هاي كله يطلع معاي بس 5:30 من اليوم .

اما الاستغلال آقصد فيه شي مفيد مفيد مثل ::

- دراسة
- ممارسة هواية
- رياضة
-قراءة قرآن
- اذكار

وهاي كله ياخذ من اليوم تقريبا ً 5:00 بس

اما الشي الاخير مايصير نستغني عنه وهو الصلاة ::

كل الصلوات الخمس من الاذان إلى الاقامه تاخذ ساعتين بس من اليوم .

الحين تعالوا نحسب اللي سويته فاليوم من المذكور بنلاقي اني استغليت 12:30 من اليوم , استغلال في مكانه يعني مب اي كلام .

انا الحين شاسوي ؟ طول الوقت ع النت او آلعب وهاي غلط , حتى هالشي من زمان مب من الحين
لو باحسب في الـ 21 سنه ورى اشسويت بلاقي نفسي مستقل بس 4 سنوات من عمري او اقل والباقي كلام فاضي .

عشان جي قلت مابخلّي وقتي كامل للماسنجر نفس الحين , باخلّيه بس 4 ساعات فاليوم للماسنجر والوقت بيكون من الساعه 7 فالليل لين 10 ونص وبعدها نوم إلى الساعه 4 واقوم لصلاة الفجر وجي .

بالنسبه للأيام من الاحد إلى الخميس لكن يوم الجمعه لازم بيصير تغيير في الجدول لأنه نهاية الاسبوع وهو معروف بزيارة الاهل او الربع الخ .

بس ملاحظه مهمة , كل واحد عنده اشياء يسويها مب شرط اللي اسويه انا , اللي عنده هواية الرسم واللي عندة الرياضه الخ الخ , بس في اشياء لايمكن نتخلى عنها وهم ::

- الصلاة
- النوم

باقي الاشياء ممكن نتحكم فيها ونعدّل عليها , أما هالشيئين لايمكن تغييرهم .

وقتها بتحسون نفسكم " بشر " لكم اهداف خاصة تسعون لها , يعني في اليوم نفسه بتسوون كل شي ! هواياتكم , ماسنجر سوالف , طلعه ماطلعه , أكل , نوم , سبوح , دراسه كـــــــــــــل شي بتسوونه فاليوم , بتحسون بإرتياح وحتى الصلوات الخمس مابتفوتكم اللي للأسف الشديد الكل امقصّر فيها الاّ من رَحم ربّي واتمنى اكون غلطان >_>

بس ترى حطوا في الاعتبار لاتقصون على روحكم وتكتبون اشياء لـ 24 ساعه كامله , لا , كتبوا بس لـ 15 ساعه على الاقل فاليوم لأن غصب عليكم في وقت بيروح على الفاضي .

واصلا ً مافي انسان يستغل وقته كامل ! لازم فيه اشياء اتخرّب , فاااا الـ 12 ساعه احسن من لاشي

مثل الحين , وقتنا كامل للماسنجر والانترنت وهاي غلط , المفروض انمارس الرياضه , نقرى قرآن , انصلي , ندرس , انسولف , نطلع , ناكل , نرقد الخ الخ فاليوم الواحد .

ختاما ً أذكّر بأهم مافي الموضوع :-

- تنظيم وقتكم باللي تقدرون علية
- استغلاله في أحسن وافضل الاشياء
- البعد عن الكمبيوتر قدر المستطاع لأنه مؤذي
- التركيز على هواياتكم

واتمنّى تسوون جدول لهالشي , راح يفيدكم وايد كبداية وبعدها بفتره بسيطه بتحفظونه عن ظهر قلب مثل مايقولون .

واتمنى بعد تنقلون الموضوع أو حتى تزيدون كلام من عندكم المهم ابي اشوف الناس تستغل وقتها في الزين مب في الشين .

واتمنى انكم استفدتوا في المقام الاول والاخير .

تحياتي .

مــــــنـــــــــــقول ان شاء الله يعجبكم الموضوع

انتظر ردودكم :D :?:

يعطيك العافيه على الموضوع المفيد وإن شاء الله اقدر اطبقه